தமிழா ! தமிழோசைக் காண் !

copyright : Srikanthbfa

தமிழே!
தேனே!

கனியே!

அமுதே!

ஆசையில்லா மனிதனுண்டா ?

ஓசையில்லா மொழிகளுண்டா?

ஆசைகள் வளர்ச்சி தரும்;

பேராசை அழிவைத் தரும்.   

ஓசைகள் இன்பம் தரும்;

தமிழோசை அமுதம் தரும்.

ஒரு நாள் அதிகாலை

அணைத்து மொழிக்கூட்டம்.

மொழிகள் பேசியது - தம்மை

முன்னிலைப் படுத்திக் கொள்ள.

ஆங்கிலம்  சொன்னது

அகிலம் ஆள்பவன் நானென்று !

இந்தி சொன்னது

இந்தியாவின் மொழி தானென்று!

சமஸ்கிருதம் சொன்னது 

ஆண்டவனறியும் மொழி தாமென்று!

தமிழ் சொன்னது - உங்களின்

தாய் நானென்று !!!

மலரும் மழலை கூறும் "அ"கரம்

முதுமை மொழியும் ஆயுதம்

பிறமொழியில் காணாத "ழ" கரம்

அப்பப்பா ....

தமிழ் எத்தனை இனிமை - இது

தமிழன் மொழி என்பது பெருமை.

இசைக்கு உவமை குயில்

அது கூவும் மொழி தமிழ்.

மழைக்கு ஆடும் மயில்

அதுகுளிருக்கு  போர்வை தந்தது தமிழ்.

கருத்துக்கு முதன்மைப் பெறுவது குறள்

அதுபிறந்து வளர்ந்த மொழி தமிழ்.

வன்மையைச் சொல்ல வல்லினம்

மென்மையைச் சொல்ல மெல்லினம்

இடைப்பட்ட நிலைதான் இடையினம்.

அறிவாயா நீ காரணம்?

வன்மைக் கொள் அதர்மம் தீண்டும் நேரத்தில் 

மென்மைக் கொள் காதல் தொடும் தருணத்தில்

இடையில் நில் கோபம் வரும் தீக்கணத்தில்.

மனதின் ஓசை கேட்டால் ...

பகைமைக் கூட நட்பாகும்.

மழலை ஓசை கேட்டால்...

கோபம் கூட பாசமாகும்.

இயற்கையின் ஓசை கேட்டால் ...

கற்கள் கூட கவிதையாகும்...

தமிழின் ஓசை கேட்டால்...

தகரம் கூட தங்கமாகும்.

தமிழா !

தமிழோசை காண்

மனதாசை வீண்

மணியோசை இனிது

தமிழோசை அமுது

குழலோசை கானம்

தமிழோசை ஞானம் 

மழலையோசை உன் படைப்பு

தமிழோசை அவன் படைப்பு.

தமிழை தெரிந்தவன் கால் மனிதன்

தமிழை அறிந்தவன் அரை மனிதன்

தமிழை உணர்ந்தவன் முக்கால் மனிதன்

தமிழை காப்பவன் முழு மனிதன்.

தாயை மறந்தவன் தரம் கெட்டுப்  போவான்;

தமிழை மறந்தவன் தானழிந்து போவான்.

- சத்தியசீலன்@கிறுக்கல்கள்100 

♥ குட்டி குட்டி காதல் கவிதைகள் ♥

Copyright : Transformers Film

நீயும் காலன் தானடி - என்

காதலை வதை செய்ததால்

நானும் பாவம் தானடி - உன்னை

நான் காதல் செய்ததால்.  

♥

தேவதையே !

உன் நினைவுகள்

என்னில் வரும்பொழுதெல்லாம்

நானும் பைத்தியம் தான் - என்

அறைசுவர்களுக்கு.

♥

 

அன்பே! 

காகிதங்களின் காயங்கள்

கவிதைகள் தானடி - என்

இதயத்தின் காயங்கள் - நம்

காதல் தானடி !

♥ 

    -   சத்தியசீலன்@கிறுக்கல்கள்100

ஏனடி ! இப்படி அழகானாய் ?

Copyright : http://safa.tv

ஏனடி ! இப்படி அழகானாய் ?

அழகால் என்னைத் தின்கின்றாய்.

சொல்லடி அன்பே ஆருயிரே!

சாகவும் தோணுதே காதல் தானோ! ( பல்லவி )

அரைநொடி வாழ்தால் கூட - உன் 

அரவணைப்பில் வாழ வேண்டும் .

அடுத்தநொடி இறந்தால் கூட - உன்

மடி மீது நான் சாக வேண்டும்.  ( சரணம் - 1 )

பிரம்மன் செய்த பிழையோ- நீ

பெண்கள் கூட்டத்துத் தேவதையோ ! - என்

உயிரைக் குடிக்கும் மோகினியோ - பலர்

உயிரைக் காக்கும் தேவதையோ. ( சரணம்  -  2  )

சிரிக்காமல் சிரிப்பது எப்படியோ! - என்னுயிரைக்

குடிக்காமல் குடிப்பது எப்படியோ!

அழுகின்ற பொழுது அணைத்திடடி - நான்

அணைக்கின்ற பொழுது அச்சம் தவிர்த்திடடி. ( சரணம் - 3  )

கிறுக்கன் என்னைக் கவிஞனாக்கினாய் ;

கவிஞர்கள் பலரைக் கிறுக்கனாக்கினாய்.

அழகைக் கொண்டே ஆளைக் கொல்கிறாய்;

அகிம்சைக் கொள்கை ஏற்க மறுக்கிறாய்.    ( சரணம் - 4  )

முத்தம் கேட்டு முயன்றிடவில்லை -உன்னை

நித்தம் பார்க்க முறையிடவில்லை.

சத்தம் இன்றி நுழைந்தாயே - என்னை

நித்தம் நீயே வென்றாயே ! ( சரணம் - 5  )

 

- சத்தியசீலன்@கிறுக்கல்கள்100

உதிர்ப்பவள் நீ !

Copyright : 1x.com

மழை ஒதுங்கும் மாலை நேரத்தில் 

மரத்தினடியில் நான் ஒதுங்க - நீ 

விளையாட்டாய் ....  

கிளை உலுக்கி உதிர்த்துவிட்டு போன 

மழைத்துளிகளாய் ....

உன் நினைவுகள் !

உதிர்ப்பவள் நீ 

நனைபவன் நான் !

-சத்தியசீலன்@கிறுக்கல்கள்100

மன்னிக்கவும் கோகுல் !

Copyright - http://www.keeprelationships.com

குறிப்பு : நண்பர்களுக்குள் ஊடல் வருவது இயல்பு தானே ! அப்படியொரு ஊடல் பொழுதுகளில் உதிர்த்த வரிகள் . நண்பர்களை, அவர்களின் நட்பை புரியாமல் தவிக்கும் அனைத்து நண்பர்களுக்கும் இக்கவிதை . 

நண்பனே - நீ

என் வாழ்க்கையில் 

உன் பகுதியைச் 

சுருக்கிக் கொண்டாய்.

நான் - என் 

வார்த்தைகளை 

உன்னிடம்

சுருக்கிக் கொண்டேன்.

நான்

பேச நினைத்த போது

பேசாமல் விலகினாய் 

நீ

பேச நினைக்கும் போது 

பேச இயலாமல் 

விலகுகிறேன்.

நான் 

உன்னிடம் பலவற்றைப் 

பகிர்ந்து கொள்ள 

விழைகிறேன். 

இன்று தான்

புரிந்தது நீயும்

விழைகிறாய் என்று ...

பகிர்ந்து கொள்ள அல்ல 

பிரிந்து செல்ல

உன்னை இன்னொரு

அருணனாய் நினைத்திருந்தேன் - அதனை

அர்த்தமற்ற அந்தியாய் மாற்றி விட்டாயே !

சுகதுக்கங்களை     

சுதந்திரமாய்

சொல்லுமிடம்

நண்பனுள்ளம்.

அந்த நண்பனிடத்திலேயே 

சுதந்திரமில்லை

பிறகென்ன

அந்த உள்ளத்திற்கு.

நானும் பழகிக்கொண்டேன்

உன்னைப் போல் இருப்பதற்கு...

காலையில் காலை வணக்கம்

மாலையில் மாலை வணக்கம்

முடிந்தது நட்பின் இலக்கணம்.

என்ன தான் 

நடிக்க முயன்றாலும்

தோற்று விடுகிறேன் - உன்

இயல்புக்கு முன்னால் .

உள்ளத்தின் உண்மைகளை

உள்ளத்திலேயே வைத்திருந்தால் 

யாரறிவார் அது உண்மையென்று !

காதலினும் உயர்ந்தது நட்படா ! - நம்

நட்பிற்கு அவ்விடம் இல்லையடா!

காதலில் கூட மறைத்திடலாம் 

நட்பிடம் மறைப்பது அரிதடா !

நான் சொல்வது 

உனக்கு மட்டுமல்ல 

நட்பைப் புரியாத 

அனைத்து நல்லவர்களுக்கும்.

எது எப்படியிருந்தாலென்ன ?

உன் விருப்பம் போல் ...

நண்பனே !

விடை பெறுகிறேன் - என்

வார்த்தைகளைச் சுருக்கிக் கொண்டு . 

-சத்தியசீலன்@கிறுக்கல்கள்100

❧ அப்பா ❧

Copyright : ftp.cdc.gov

குறிப்பு : இக்கவிதை என் நண்பன் கோகுலின்  தந்தை எங்களை விட்டுப் பிரிந்த பொழுது எழுதியது. இதுவரை அவனுக்கு நான் இக்கவிதையை அனுப்பி வைக்கவில்லை ! முதல் முறையாக உங்களுக்காக ....

அன்பு நண்பனே!

ஆறுதல் கூற வயதில்லை

இருப்பினும்....

ஆசை - என் 

அன்பு நெஞ்சம் 

ஆழ்ந்த வருத்தத்தில் - நம்

அன்பு அப்பா 

மறைந்த  நினைவினில் ...

என் வார்த்தையால் 

உன்  வருத்தத்தை 

விலக்க இயலா !

நீ

அடைந்த மதிப்பெண்கள் 

படிக்கும் கல்லூரி

பார்க்கும் வேலை

கிடைக்கும் சம்பளம்

வாழ்க்கையின் சந்தோசங்கள் 

யாருக்காக

என்பது

எனக்கு தெரியும்.

எனக்குத் தெரிந்து

என்ன பயன் ?

தெரியவேண்டிய அந்த

தெய்வத்திற்கு

தெரியவில்லையே ! 

நடந்தது நினைத்து 

கண் சிந்தாதே !

நிறைவான சந்தோசமும்

மிதமான கோபமும்

கடின உழைப்பும்

உதவும் மனமும்

உனக்குள் கொள்;

உலகம் உன்னைத் தன

தலையில் கொள்ளும்.

மூத்த மகன் நீ

பொறுப்புகளுக்கு மூத்த மகன்.

பற்றுகோல் நீ

உன் குடும்பத்திற்கு ...

தூணாக விளங்க வேண்டிய நீ    

துவண்டு விடக்கூடாது.

துணிந்து நில்

தூரங்கள் தூக்கிலிடப்படும்;

துன்பங்கள் துன்பப்படும்.

இந்நிகழ்வு கண்டு

வருந்தாதே!

சோகங்கள் மட்டும் தான்

பாடங்கள் புகட்டும்.

சொந்தங்கள்...

பந்தங்கள்...

நண்பர்கள்..

பகைவர்கள்...

அறிந்திருப்பாய் ...

அவர்களைப் பற்றி 

அனைத்தையும்

அறிந்திருப்பாய்.

நிலையான இந்த உலகில்

நிலையில்லாதது நம் வாழ்வு;

நிலையில்லாத வாழ்க்கையில்

நிலையான புகழைத் தேடு.

துன்பங்கள் உன்னைத் தொடும் போது ...

கண்ணை மூடு

கடவுளை நாடு

கவலைகள் விடு

கடமைகள் தொடு    

மனதின் வடு

என்னிடம் விடு 

மற்றவர்  துன்பங்களைத் தாங்கிக் கொள்ள 

நான் ஒன்றும் ஏசுபிரான் அல்ல ....

 

இருப்பினும் தாங்குகிறேன் ,

ஏனெனில் 

நீ எனக்கு மற்றவனல்ல !!!!

-சத்தியசீலன்@கிறுக்கல்கள்100

   

இது நம்ம பாட்டு தான் !

Photo Courtesy : Sathyaseelan Rajendran

குறிப்பு : கொஞ்சம் வித்தியாசமான நேரத்துல தான் இந்த கவிதை எழுதுற சூழல் எனக்கு வந்துச்சு. எங்க Batch Day ... எப்பொழுதும் போல இல்லாம கொஞ்சம் வித்தியாசமா எதாவது பண்ணலாம்னு யோசிச்சோம் . சரி ஒரு பாட்டு compose பண்ணுனா என்னான்னு தொன்றிணப்ப தான் ... இந்த வரிகள் . உங்க Mind Voice எனக்கு புரியுது ! எதுப்பா ? உங்க Batch அப்படின்னு தானே கேக்குறீங்க ! என்னோடது 2006 Batch of Thanjavur Medical College. And I am proud to Say My Batch name ... Ya We are VALIANTZ .

நட்பென்னும் வலையைப் பிண்ணிகொண்டோம்
நட்புக்குள் நாங்கள் மாட்டிக் கொண்டோம்
நட்பாலே நாங்கள் வாழுகின்றோம் - எங்கள்
நட்பாலே பிறரை வாழ வைப்போம்.

நட்புக்கு அகராதி நாங்கள் தானே !
கர்ணனும் எங்கள் சீடன் தானே !
நட்பிற்கு தாஜ்மஹால் கட்டிவிட்டோம் - எங்கள்
கல்லூரி கற்களிலே கலந்து விட்டோம்.

சோகங்கள் கண்ணில் மழை பொழியும் - நண்பன்
கைவிரல் தானே துடைத்துவிடும்;
வெற்றிகள் தலையில் ஏறிக்கொள்ளும் - நண்பன்
குட்டுகள் தானே இறக்கி வைக்கும்.

கனவுகள் மட்டும் காண மாட்டோம் - பலர்
கனவுகள் கனிந்திட வழிவகுப்போம்.
மருத்துவம் மட்டும் பார்க்க மாட்டோம் - பலர்
மனங்களில் மகனாய்/மகளாய் வாழ்ந்திடுவோம்.

ஆட்டம் பாட்டம் கொண்டாட்டம்
எந்நாளும் மாறாது இந்தக் கூட்டம்.

-சத்தியசீலன்@கிறுக்கல்கள்100

உன்னைப் பற்றி ...

Copyright : Ganesamoorthy

குறிப்பு - இது என் பள்ளிக் கால நண்பன் கணேசமூர்த்திக்காக நான் 12 வகுப்பு படிக்கையில் எழுதப்பட்டது ! இக் கவிதையை அவனுக்காக மட்டும் அல்ல இதைப் படிக்கும் உங்கள் அனைவருக்கும் , என் நட்பை நேசிக்கும் அனைவருக்கும்  சமர்ப்பணம். கல்லூரிப் பெண்கள் கவனத்திற்கு 'HE IS STILL SINGLE' !

அழகின் 

அகராதி

நட்பின்

இமயம்

புறத்தால்

கெட்டவன்

மனத்தால்

தூயவன்

படிப்பில்

பரவாயில்லை

நடிப்பில்

நடிகர் திலகம்

துடிப்பில்

இதயம்

பழகுவதில்

பால்

விலகுவதில்

விலாங்கு

பிடித்தது

காதல்

பிடிக்காதது

துரோகம்

புரிவது

பாசம்

புரியாதது

பாடம்

ஆடைகளில்

ஆணழகன்

இல்லாமல்

பேரழகன்

பேச்சில்

கனிவு

பாட்டில் 

தெளிவு                              

வீட்டில் 

நல்லபிள்ளை

விடுதியில்

கெட்டபிள்ளை      

இன்னும் சொல்ல 

என்னிடம் வார்த்தையில்லை

ஏன்?

தமிழிளுமே வார்த்தையில்லை .

- சத்தியசீலன்@கிறுக்கல்கள்100

சுமைகள்

Copyright : www.designzzz.com

எத்தனை சுமைகள்

நம் மனித வாழ்வுதனில்...

பிறந்தவுடன்

அரைஞான்கயிறு ஒரு சுமை

ஓர் வயதில்

உடைகள் ஒரு சுமை

1 முதல் 5 வரை

உணவு ஒரு சுமை

5 முதல் 10 வரை

மருந்து ஒரு சுமை

10 முதல் 15 வரை

படிப்பு ஒரு சுமை

15 முதல் 20 வரை

பருவம் ஒரு சுமை

20 முதல் 25 வரை

பணம் ஒரு சுமை

25 முதல் 30 வரை

மனைவி ஒரு சுமை

30 முதல் 35 வரை

மக்கள் ஒரு சுமை

35 முதல் 40 வரை

உறவுகள் ஒரு சுமை

40 முதல் 50 வரை

பழைய பதிவுகள் ஒரு சுமை

50 க்கு மேல்

நாமே ஒரு சுமை

சுமைகளிருந்தாலென்ன

அதை சாதிக்கும்

தகைமை உன்னிடம் உள்ளதன்றோ?

பிறகேன் கவலை!

சுமைகளை 

உடைத்து சூடங்களாக்கி

உன் வெற்றிகளுக்கு 

ஆராதனை காட்டு !

- ஜெயம்

 

 - சத்தியசீலன்@கிறுக்கல்கள்100

அன்புள்ள அம்மாவுக்கு ...

Photo Courtesy : http://www.mnn.com

குறிப்பு - இக்கவிதை தஞ்சை மருத்துவக் கல்லூரியில் தாய்ப்பால் வார விழாவையொட்டி நடைபெற்ற கவிதைப்போட்டியில் இரண்டாம் பரிசு பெற்றது.

அன்புள்ள அம்மாவுக்கு

அன்பு (?) மகன் எழுதும்

அழகிய மடல் .

ஆச்சரியப்படாதே !

அம்மா

கடிதங்கள் ஆச்சரியம் தான்

கணினி உலகில்.

பாசங்கள் ஆச்சரியம் தான்

மனிதம் மடிந்த - இந்த மண்ணில்.

என்றுமே! நீ எனக்கொரு

அதிசயம் அம்மா

அதிசயங்களே கண்டு வியக்கும்

அதிசயம் நீ அம்மா!

நான் கேள்விப்பட்டதுண்டு...

அம்மம்மா சொன்னார்கள்;

என்னை சுமப்பதற்கு முன்பு

"மலடி" என்ற பட்டத்தை 

மூன்றாண்டு சுமந்தயாமே !

அம்மம்மா சொன்னார்கள்.

அப்பத்தா சொன்னார்கள்;

மணம் முடிந்த முதல்

அரை வருடம் உனக்கு

அடுப்பங்கறை அத்துப்படி இல்லையாமே !

அப்பத்தா சொன்னார்கள்.

அப்பா சொன்னார்கள்;

அடுத்த வீட்டுடன் 

அடிக்கடி

அடிதடியில் நிற்பாயாமே !

அப்பா சொன்னார்கள்.

எத்தனை முறை அழுதிருப்பாய் ..

இத்தனை குற்றச்சாட்டுகளுக்கு.

அத்தனைக்கும் மகுடமாய்

உன்னை நான் அழவைத்தேனே!

அன்றைய நாள்

என்னென்ன நினைத்திருப்பாய்?

அத்தனையும் நான் அறிவேன்!

அம்மா! நான் அறிவேன்.

அனைத்து குற்றங்களும்

மன்னிக்கப்படும் ஒரே நீதிமன்றம்

உன் உள்ளம் தான் அம்மா

குற்றவாளி நானாக இருக்கையில் மட்டும்.

அண்மையில் தான் படித்தேன்

தாய்ப்பால் ...

அறிவை வளர்க்குமென்று

அதிகமாய் வளர்ந்ததால் என்னவோ! - உன்னை 

அனுப்பி வைத்துவிட்டேன்.

அன்று ஒரு நாள் 

அநாதைச்  சிறுவன்...

அர்த்தநாரீஸ்வரர் சாலையில்

" அம்மா தேடி அலைகிறேன் " - என்றான்

அவனை அழைத்து

அவனைக் கேட்டேன் - அம்மா 

அவன் சொன்னான்.

" தாய் -  தெய்வம்     

அதனால் தான் என்னவோ ! - அவள்

காட்சி கிடைக்கிறது

தவமிருப்பவர்களுக்கு மட்டும்"

மேலும் சொன்னான்...

" பிறந்தவுடன் எறிந்து விட்டார்கள் ;

தப்பில்லை ... தாய்ப்பால் தந்தபின்பு எறிந்திருக்கலாம்

நானாவது நடந்திருப்பேன் - என்

தமிழ் போல் நொண்டாமல்.

 

தேடல் தான் வாழ்க்கை என்றான்  

தேடித் திரிகிறானாம் தினத்தோறும்

அவன் அன்னையை...

தேகத்தில் வலிமையில்லாமல்.

இறுதியாக அவன் கேட்டுக் கொண்டான்

"தந்து விடுங்கள்

தைரியத்தை தூக்கி எரியும் முன்பே - இல்லை

கொன்று விடுங்கள்

எங்களை மண்ணில் மலரும் முன்பே "

அவன் வார்த்தையில்

வந்து சென்றதம்மா - உன் முகம்.

இமைகளுக்குள் சிறைபிடிக்க

முடியவில்லை...

சிதறிவிடுகிறது என் கண்ணீர் - அன்று 

நீ சிந்தியது போல.

அதற்குள்  அவள் கேட்டு விடுவாள்; 

உன்னை மறக்காமல்...

" இன்னமும் உங்க அம்மா ஞாபகம் போகலையா?"        

என்னமா! யோசிக்கிறாய்

கடிதம் எதற்காக என்று தானே ?

இதோ சொல்லி விடுகிறேன்

உன்னைவிட்டுச் சென்றவரிடம் கேட்டுச்சொல் ...

இரண்டு இடம் காலியாய் இருக்குமா? என்று.

என் மகன் 

இரண்டு மாதமாய் தேடி அலைகிறான் - எங்களுக்கான

முதியோர் இல்லத்தை.

-சத்தியசீலன்@கிறுக்கல்கள்100

பனித்துளி சங்கர்

குறிப்பு : இக்கவிதை என் இணைய நண்பர் பனித்துளி  சங்கர் மற்றும் அவர் தமிழுக்காக  ...

அவரின் வலைப்பூ முகவரி -  http://www.panithulishankar.com/

பனித்துளி

புனிதமானது ....
பனித்துளி
அழகானது...
பனித்துளி
உண்மையானது...
பனித்துளி
மென்மையானது...

நண்பா!!!
பனித்துளி மை  கொண்டு
ஆழ்கடல் அறிவு சேர்க்கும்
அற்புதம் யாரிடம் கற்றாய் ?

அரை நொடி உன் வலை படித்தால்
ஆழ் மனதில் பூ பூக்கும் !!
அடுத்த நொடி உன்னை வாழ்த்த
ஆயிரம் வார்த்தைகள் கை கோர்க்கும் !

உன் தமிழுக்கு மட்டும் தான்
தரம் உண்டு ..

தரணியில் உள்ள தவறுகளை தட்டிக் கேட்க !!

தொலைவில் நீ இருந்தாலும் - உன்
தமிழ் மட்டும் நான்
தொடும் தூரத்தில் ...

பகட்டாய் பேசித்திரிபவர்களுக்கு மத்தியில்
பண்பாய்  பேசும்
பனித்துளி ...

உன் மைத்துளி
பிரபஞ்சத்தின் அறிவுத்துளி
காதலர்களின் கண்ணீர்த்துளி
தமிழின் தேன்த்துளி 
முகிலின் மழைத்துளி
காமத்தின் உயிர்த்துளி
கடவுளின் கவித்துளி

மொத்தத்தில் உன்னை
முத்தமிட மறந்தவர்களுக்கு  மத்தியில்
முத்தமிடுகின்றன என் தமிழ்  - உன்
தமிழை !!! 

-சத்தியசீலன்@கிறுக்கல்கள்100

மலர் vs மங்கை

Copyright : Flickr

என் அன்பே !

பூவிதழ்கள் சிந்தும் தேனும்

பூவை நின் இதழ்கள் சிந்தும் தமிழும்

ஒன்றோ! நன்றோ!

மனதில் சத்தமிடும் உன் நினைவும்

மலரை சுற்றி வரும் மணமும்

ஒன்றோ! நன்றோ!

மலர்கள் பிரசவித்த கனியும் - உன்

நினைவுகள் பிரசவித்த கவிதையும்

ஒன்றோ! நன்றோ!

காசுக்காக கடத்தப்பட்ட கனியும் - உன்

கல்யாணத்திற்காக கடத்தப்பட்ட நம் காதலும்

ஒன்றோ! நன்றோ!

அன்பே ..

கனிகளின் கல்லறை தான்

மரங்களின் கருவறை - பலர்

காதலின் கல்லறை தான்

கவிதைகளின் கருவறை.

உன் மணவறையிலும்

என் பிணவறையிலும்

நாம் வேண்டுமானால் மறித்துப்  போகலாம் - ஆனால்

நம் நினைவுகள் !!! 

       

- சத்தியசீலன்@கிறுக்கல்கள்100

ஏசுபிரான் அல்ல ....

Copyright : kmadisonmoore.blogspot.com

துன்பங்கள் உன்னைத் தொடும் போது ...

கண்ணை மூடு

கடவுளை நாடு

கவலைகள் விடு

கடமைகள் தொடு    

மனதின் வடு

என்னிடம் விடு 

மற்றவர்  துன்பங்களைத் தாங்கிக் கொள்ள 

நான் ஒன்றும் ஏசுபிரான் அல்ல ....

 

இருப்பினும் தாங்குகிறேன் ,

ஏனெனில் 

நீ எனக்கு மற்றவனல்ல !!!!

- சத்தியசீலன்@கிறுக்கல்கள்100

அட ! இன்னுமா தெரியவில்லை

Copyright : http://www.profimedia.com

சந்தோசமாய் மலர்ந்தது காலை - அந்த

சூரியனின் உதயத்தில் ...

வழக்கமாய் செல்லும் வகுப்பறைகள்

தினசரி வாசிக்கும் அதே முகங்கள்

எல்லாம் சரிவர இருந்தன முகத்தில் 

சந்தோசத்தைத் தவிர ...   

அந்நியர் போல் நண்பர்கள்

ஆளுக்கொரு திசையில்

அவரவர் புத்தகத்தோடு.  

முத்தமிட இதழ்களா தேவை?

அட! முத்தமிடுகின்றனவே  

விரல்களும் விழிகளும் 

புத்தகத்தின் பதிப்புகளோடு.

அச்சம், அடக்கம், அகங்காரம், அனுபவம்

அனைத்தும் காணலாம்

அவர்கள் விழிகளில் 

அன்று மட்டும்.

புத்தகத்தை சிறுபதிப்பு எடுத்து

சின்ன சின்ன இடைவெளிகளில்

சிதறாமல் ஒழித்து வைக்கும்

சில மாணவர்கள்    

மூளையை மட்டுமே நம்பி

முன்னுக்கு வரத் துடிக்கும்

முதல் மாணவர்கள்    

எது நடந்தால் 

எனக்கென்ன என இருக்கும்

ஏராளமான மாணவர்கள் ! 

விதங்கள் ஆயிரமிருந்தாலும்

விழிகளில் ஒரே பயம் தான் .. 

அதிகாலை விழிப்பு

அரைகுறை சாப்பாடு

ஆண்டவநிடும் கோரிக்கை 

அவசரமாய் புரட்டிய பக்கங்கள்

அனைவரின் ஆசீர்வாதம்

அன்று மட்டும் பேசாத அவர்கள்

எல்லாம் இந்நாளின் சிறப்பு நிகழ்சிகள் !

 

அத்தனை சிரமங்களுக்கு நடுவிலும்

அவர்களின் அவ(ள்/ன்)கள் சொல்லும்

ALL THE BEST ற்காக காத்திருந்த அவர்கள் !   

அட ! இன்னுமா தெரியவில்லை 

இன்று தான் அவர்களுக்கு பரீட்சை !!!

- சத்தியசீலன்@கிறுக்கல்கள்100

வகுப்பறை

Copyright : Wikipedia

கரியைத் தோற்கடிக்கும்

கருமை கொண்ட

கரும்பலகை

 பாலை மிஞ்சிவிடும்

வெண்மையைக் கொண்ட 

சுண்ணாம்புக்கட்டி

கருப்பரும் வெள்ளையரும்

இணைந்தால் தான் அழகு பெறும்

உலகம் அழகு பெறும்

என்பதை உணர்த்தும் இவையிரண்டும்

அடுக்குகள் மாறாமல் 

அழகாய் அடுக்கப்பட்டிருக்கும்

மரப்பலகைகள்

அவ்வப்போது தென்றலோடு கலந்துவரும்

ஆசிரியரின் தாலாட்டு

விழிக்க மனம் நினைத்தாலும்

ஒற்றுக் கொள்ளாமல்

போராட்டம் நடத்தும் இமைகள்

ஆசிரியரின் வார்த்தைகளை

அவரை விடவும்

அழகாய் உச்சரிக்கும் என் நண்பர்கள்

நேற்று பார்த்த 

திரைப்படங்கள், விளையாட்டு நிகழ்சிகள், பாடல்கள்

மறுஒளிபரப்பு செய்யப்படும்

எங்கள் வகுப்பு அலைவரிசையில்...

உலகப்போர் எங்கள் வகுப்பிலும்

சுண்ணாம்புக் குண்டுகளோடு.

அர்ச்சுனனின் அம்புகளுக்கு இணையான 

அம்புகளாய் - என் நண்பர்கள்

விடுப்புமணி அடித்தவுடன்

எல்லோரும் சென்ற பின்பு

ஏக்கத்துடன் ஏங்கியிருக்கும் ஒரு ஜீவன்

அது வேறு யாருமல்ல - எனது 

வகுப்பறை தான் !  

- சத்தியசீலன்@கிறுக்கல்கள்100

                     

மூக்கு

Copyright : Wikipedia

குறிப்பு : இக்கவிதை தஞ்சை மருத்துவக் கல்லூரியில் நடைபெற்ற   "அரங்கேறும் அங்கங்கள் "     கவியரங்கில் பதிவு செய்யப்பட்டு பாராட்டைப் பெற்றது. 

 அங்கீகரிக்கபடாத அங்கம்

அழகைச் சொல்ல அங்கம்

அறிவுக்குதவா அங்கம்

அவசியமில்ல அங்கம் - இவ்

அவையோரின் எண்ணம் - பலர்

அகத்தின் எண்ணமும் கூட !

கண்கள் கண்டதைக் காணச் சொல்லும்

செவிகள் வதந்திகள் கேட்கச் சொல்லும்

இதழ்கள் பொய்கள் பேசச் சொல்லும்

நாசி நல்லதை மட்டும் செய்யச் சொல்லும்.

அனைத்து அங்கங்களும்

அழிவிற்கு வழிவிடும் - இவன் மட்டும் தான் 

ஆக்சிசனுக்கு வழிவிடுவான்.

அங்கங்கள் பழுதானவர்கள்

அகிலத்தில் உண்டு;

இவன் பழுதானவன்

எவ்வுலகினில் உண்டு.

பாண்டியனின் நாசி

நக்கீரர் புகழ் பாடச் செய்தது

சூர்ப்பநகையின் நாசி

இராமகாவியம் கூறச் செய்தது.

அவமானத்தில் வீழ்பவனும் இவனே !

அகங்காரத்தில் எழுபவனும் இவனே !

" மூக்கிற்கு மேல் கோபம் " - அடைமொழி

காரணம்

அங்கத்தில் உயர்ந்தவன் மூக்கு.

அவனின் உயர்ந்தது உன் கோபமா?

வார்த்தைகள் மறித்துப்போகும் நேரத்தில் கூட

மூச்சுகள் பேசிக் கொள்ளும்.

ஆயிரம் நட்சத்திரங்கள் ஆகாயத்தை அலங்கரித்தாலும்

மதியில்லையென்றால் மயக்கமில்லை.

ஆயிரம் அங்கங்கள் நம்மிடம் இருந்தாலும்

அலகு இல்லை என்றால் அழகு இல்லை.
 

விழிகள் ஓய்வு கொள்ளும் இமைமூடும் நேரத்தில்

இதழ்கள் ஓய்வு கொள்ளும் மௌனம் கொள்ளும் நேரத்தில்

செவிகள் ஓய்வு கொள்ளும் அமைதி உலவும் நேரத்தில்

கை, கால்கள் ஓய்வு கொள்ளும் துயில்பயிலும் நேரத்தில்

இவனும் ஓய்வு கொள்வான் இதயம் உறங்கும் நேரத்தில்.

இவனிடம் பேசாதவர்கள் உண்டா?

மலர்கள் பேசும்; மணங்கள் பேசும்/

ஏன்!

கைக்குட்டை கூட பேசும்

ஜலதோஷம் வரும் பொழுது...

வானத்தின் நட்சத்திரம் 

தமிழச்சியின் மூக்குத்தி

அங்கத்தின் நட்சத்திரம் 

அவளுடைய மூக்கு.

அங்கங்கள் செத்துவிட்டால்

நாம் சாவதில்லை

இவன் செத்து விட்டால்

நாம் வாழ்வதில்லை

நேசிக்க மறந்தவர்கள் கூட சுவாசிக்க மறப்பதில்லை

சுவாசிக்க மறந்தவர்களை நாம் நேசிக்க நினைப்பதில்லை !!

மூச்சை துறந்தவனும் மனிதனல்ல!

மூக்கை மறந்தவனும் மனிதனல்ல !!

-சத்தியசீலன்@கிறுக்கல்கள்100

பின் குறிப்பு

Copyright : souvenirsfromgreece.com

அம்பது பவுன் நகை வேண்டாம்

அடுக்குமாடி வீடு வேண்டாம்

அழகான கார் வேண்டாம்

அளவற்ற பொருட்கள் வேண்டாம்

வரதட்சணையாய் - வேண்டுமொன்று-

அவள்

பின் குறிப்பு : கற்போடும் ... காதலோடும் ...

-சத்தியசீலன்@கிறுக்கல்கள்100

சமர்ப்பணம்

உடல் ஈந்த என்னருமை பெற்றோருக்கும்

உயிர்  ஈந்த நம்மில் உயர்ந்த இறைவனுக்கும்

அறிவிலியை அறிவொளியாய்  மாற்றிய ஆசானுக்கும்

தடையின்றி என் எழுத்தில் வரும் தங்கத் தமிழுக்கும்

கரம் பற்றி வழி நடத்தும் உறவுக்கும்

கண்ணீர் கண்டு கண் துடைக்கும் நட்புக்கும் – என்

கிறுக்கல்களை முத்தமிடும் உங்கள் கண்களுக்கும்

சமர்ப்பிக்கிறேன்!!

கவிதைகளையல்ல…..

சிதறல்களை.

- சத்தியசீலன்@கிறுக்கல்கள்100

ஒரு தலைக் காதல்

Copyright : www.lovegurusrm.in

நம் காதல் என்றுமே

கானல் நீர் !

நான் மகிழ்வதோ நீரென்று

நீ நினைப்பதோ நிஜமன்றென்று.

உண்மையில் நான் தான் வெகுளி

உலக இயல்பு தெரியாத கோமாளி

அன்பை நாடும் அறிவிலி – மொத்தத்தில்

நீ ஒரு அறிவாளி.

உன்னுடன் உலகம் சுற்ற வேண்டும் – என்று

ஓராயிரம் முறை நினைத்திருக்கிறேன்;

உண்மையில் உன் உலகில்

ஓர் மூலையில்கூட நானில்லை – என்று

அண்மையில் தான் உணர்ந்திருக்கிறேன்.

உன்னுடைய நட்பு வட்டம்

உன்னுடைய நலம்விரும்பிகள்

உன்னுடைய ஆதரவாளர்கள்

உன்னுடைய அன்புக்குரியவர்கள்

அனைவருக்கும் உன்னைப் பிடிக்கும்

அதை நீ அறிவாய்

இவனுக்கும் உன்னைப் பிடிக்கும்

அதை நீ மறைப்பாய்.

உன்னை சந்திக்கும் பல சமயங்களில்

மௌனம் மட்டும் என் மொழியாக …

புன்னகை மட்டும் உன் பதிலாக.

” காதல் பிச்சை ” கேட்கிறேன் – அது ஏனோ

தெரியவில்லை – என்னிடம் வரும் பொழுது மட்டும்

உனது பைகளில் பணமிருப்பதில்லை.

செய்வதைக் காட்டிலும் சொல்வது மேலானது

அன்பில்லா இடத்தில்…

சொல்வதைக் காட்டிலும் செய்வது மேலானது

அன்புள்ள இடத்தில்;

நீயே முடிவு செய்து கொள்

சொல்வதா! செய்வதா! என்று.

நான் தவறானவன் தான் – உன்

தகுதிக்கு குறைவானவன் தான்.

அறிவுக்குத் தெரிகிறது – பாவம் என்

அகம் மட்டும் அழுகிறது.

படிப்பிலும், பண்பிலும்,

பக்குவத்திலும், பழகுவதிலும் – நீ

புதியவள் – எனக்கு மட்டும்

புதிரானவள்.

என் காதலும், கவிதையும் என்றுமே

உனக்கு நடிப்பு… – என்னை

நடிகனாய் அங்கீகரித்த முதல்

பல்கலைக்கழகமே

நன்றி !

என்னுடையது

ஒரு தலைக் காதலா?

” இல்லை “

என்று நீ சொல்லும் வரைக் காத்திருப்பேன்

ஒரு தலைக் காதலுடன் .

- சத்தியசீலன்@கிறுக்கல்கள்100